Емдеу әдісін таңдау үшін ісіктің қай жерде орналасқанын және оның морфологиялық түрін ғана білу жеткіліксіз. Қазір нақты ісікке тән молекулалық ерекшеліктерге, генетикалық өзгерістер мен биомаркерлерге де үлкен мән беріледі.

Қатерлі ісікті емдеудегі осы жаңа тәсілдер «ONCO FUTURE KAZAKHSTAN 2026» аясындағы дербестендірілген онкология және дербестендірілген медицина секцияларында талқыланды.

Бағдарламада сүт безі, бүйрек, өкпе ісіктерін, нейроэндокриндік және басқа да жаңа түзілімдерді диагностикалаудың заманауи тәсілдері талқылануда. Сондай-ақ цифрлық патологияға жеке блок арналды. Бұл технология диагностиканың дәлдігін арттырып, зерттеу нәтижелерін стандарттауға және әртүрлі бейіндегі мамандардың бірлесіп жұмыс істеуіне мүмкіндік береді.

Молекулалық-генетикалық зерттеулерге де ерекше назар аударылуда. Заманауи технологиялар ісік жасушаларындағы емдеу тәсілін таңдауға әсер етуі мүмкін өзгерістерді анықтауға мүмкіндік береді. Мамандар NGS-диагностиканың, генетикалық және иммундық биомаркерлерді зерттеудің мүмкіндіктерін, сондай-ақ олардың нақты клиникалық тәжірибеде қолданылуын талқылауда.

Тағы бір маңызды бағыт – патологтар мен зерттеушілердің жұмысында жасанды интеллект пен цифрлық технологияларды қолдану. Мұндай құралдар қазірдің өзінде ауқымды деректерді талдауға көмектесіп, диагностиканы барынша дәл жүргізудің жаңа мүмкіндіктерін ашып отыр.