Патоморфологтың нақты қорытындысы шықпай ем басталмайды, терапия тағайындалмайды және соңғы диагноз қойылмайды. Науқастың тағдыры зертханадағы тып-тыныш жұмыс үстелінде шешіледі.

17–18 қазанында Астанада Ұлттық ғылыми онкология орталығы халықаралық сарапшылардың қатысумен Қазақстан патологтарының I Конгресін өткізеді. Бұл оқиға еліміздегі медициналық диагностиканың болашағына елеулі әсер етуі мүмкін.

Бір алаңда алғаш рет Қазақстан мен әлемнің жетекші сарапшылары бас қосты. Олар патоморфология, генетика және цитологияны қалай біріктіруге болатынын, цифрлық технологиялар мен жасанды интеллектті енгізу жолдарын, сапаны стандарттау мен клиницистермен тиімді ынтымақтастық орнату тетіктерін талқылауда. Мұның бәрі бүгінде ҰҒОО тәжірибесінде сәтті қолданылып келеді.

Конгрестің басты миссиясы – өңірлердегі патологиялық қызметтің дамуына жаңа серпін беру: қашықтан кеңес беру мүмкіндіктерін кеңейту, цифрлық патоморфологияны енгізу, дәрігерлерді заманауи құралдармен және білімге қолжетімділікпен қамтамасыз ету. Өйткені дәл өңірлер бүгінде медициналық диагностиканың дамуының негізгі тірегіне айналуда.

ҰҒОО Басқарма төрағасы Жандос Бүркітбаевтың айтуынша, бүгінде патоморфология қарқынды өзгерістер кезеңін бастан өткеріп жатыр: иммуногистохимиялық және молекулалық-генетикалық әдістер, цифрлық технологиялар мен жасанды интеллект құралдары белсенді түрде енгізілуде. Бұл үдерістер стандарттарды жаңартумен қатар, мамандар арасындағы тығыз өзара байланыс пен тәжірибе алмасуды қажет етеді.

Сондықтан Конгресс – Қазақстандағы әрбір науқас, тұрғылықты жеріне қарамастан, дәл және уақытылы диагноз алуына бағытталған маңызды алғашқы қадам.

Ссылки на видео https://www.youtube.com/watch?v=msIy8k62Tfo, https://www.youtube.com/watch?v=7Bgb3hK38lM